Lalsangzuali Sailo hi kum 1949, May 15ah Thingsaiah a piang. A pa chu S. Vânchhûma niin, a nu Sàpthangi Chawngthu a ni. Unau sawmpakhat zinga upa ber a ni a.

Zirna lamah BA (Hons) 1972-ah a pass a, 1981-ah B.Ed a zo leh a. Zirtirtu hna thawh pahin 2005-ah MA (History) a zo a. Kum 1973 atangin Govt. J. L. Higher Secondary School-ah a thawk tan a, Headmistress-ah kaisângin Govt. Aizawl High School-ah leh Govt. Compre. Model School-ah te a thawk leh a ni.

Kum 1978, June 27-ah Laldinliana nên an innei a, fa pathum an nei. Kum 2006, November 14, zing dar 11 leh minute 3 khân kum 57 mi niin thluaka thisen zâm puar (Aneurysm) natna avângin ’Ka duh ber Lalpa‘ a tih hnênah a lo chawl ta a ni.

‘Lalsangzuali Sailo Hlate’ 2007-a chhuahah chuan a hla phuah 365 a chuang. Mizo thu leh hlaa a thawh hlâwk êm avângin 1998, April ni 12-a khân ‘Padma Shri in Literature’ a dawng a. A lehkhabu ziah tawh 28 zinga ‘Tlâwm ve lo Lalnu Ropuiliani’ tih chu ‘Book of the Year 1999’-ah thlan a ni a. Hla phuah thiam, zai thiam bawk si, lehkhabu ziak mi tak ni bawk si a ni.