Hla phuah thiam CZ Huala hi a hming tak chu Saikhama a ni. Kum 1902-ah Vancheng khuaah a lo piang a. A pa chu Lianthuama a ni. A pa hian amah chauhvin zawng rual tam fe mai a hual khawm rup mai a, miin mak an ti, mahni chauhva zawng rual hual khawm theih mai chu a mak reng a ni. Chu chu a fapa hmingah koh fiam nan an hmang a, a fapa hming chu ‘Zawnghuala’ tiin a pu hlen ta a ni an ti. (Hmanlai kan hming phuah dante hi chutiang chu a ni.) Vancheng atangin Chhawrtuiah an pem a, hetah hian a sei lian a ni.

CZ Huala hi lehkhathiam nih duh, zirna ngaina em em a nih avangin amahin lehkha hi a zir a, Lower Primary a ‘passed’ ve hlawl mai. Tichuan, kum 1919-ah tuna Sikulpui kan tihah hian a zir a, Middle English a exam a, pakhatna a ni nghe nghe. Kum 1920-ah Biate khuaah zirtirtu hna a thawk tan a, Kohhran lamah pawh a kul a taia thawktu pawimawh tak a ni ta zel a. Biatea an awm lai hian hla a phuah tan a ni. Kum 1932-ah Sialsukah zirtirtuin an sawn a, Pathianah hlimna thar, lawmna thar a nei a, Pathian fakna hlate a phuah ta zel a ni. Zirtirtu mai ni lovin School Inspector hnate pawh a thawk a, kum 1963-ah a pension a, September 28, 1994 khan then lohna ram chatuan pialral a lo pan ta a ni.

Hla hi kum 1921-ah a phuah tan a, a hla phuah hmasak ber chu ‘Lei lal puan ropui chu a tlawm ang,’ tih a ni a. Pathian fakna hla tha tak tak, lengkhawm hla, thangtharte min hnutchhiah a, kan lenkhawma kan zaia bâng thei miah lo an ni.