Rokunga Chanchin : 

Pian leh Murna:

Rokûnga hi kum 1914, February 20 khân Aizawl Vênghnuaiah a piang a. A pa chu Thangluta Hmar a ni a, a nu chu Zaliani a ni. Thangluta-te nupa hian fa an dam thei meuh lo va, Rokûnga lo pian hian an kawmthlang pitarin, “Hei zet chu nangmahni khai dingtu tûr, chhûngkaw ro a nih hi, ‘Rokûnga’ tih tûr a ni,” tiin a hming a sa a. Ani chu dam taka lo seilianin a nu leh pate tân chauh pawh ni lo, Mizo zawng zawng tâna ro tling tak meuhvah a lo tang ta a ni.

Zirna in leh hnathawh chungchang :

Rokûnga chu naupang zakzum, nunnêm leh zaidam, thu âwih thei tak a nih a vângin a nu leh pa pawh a tilâwm hle thin. Mi inngaitlâwm, mi pawi sawi ngai lo, ngilnei leh mite khawngaihna ngah tak a ni. Mipa naupang dang anga sava veh leh thangkam te, ramvah leh rannung sawisak te ching ve hauh lo a ni a; rimawi leh tumrîk lam a ngaina a; finna leh mi ropui chanchinte leh khawvel ram zau zawk chanchinte hian a beng a verh zâwk tlat thin. A lo puitlin hnuah pawh solfa a thiamin, tingtang, violin, piano tum te pawh a thiam êm êm mai.

Boys’M.E.School-ah lehkha zirin, kum 1927-ah Lower Primary a zo va, 1929-ah Middle English a zo leh. Mahni chhûngkaw dinhmun hre thiam tak mai mi a ni a, an harsatziate hriain silhfen lamah pawh a beisei sâng ngai lo va; a nu tah phawkphawhraw tak pawh a inbel hreh ngai lo. M.E.te han zo ve mah se mahni tlin tâwk babu hna melh mai lovin a nu leh pate puiin hlo a han thlo ve dâwrh dâwrh a. Aizawl atanga neih phâk ramte chu a bua hlawm hle nachungin taima taka an thawh thin avângin an ei khawp chu an thar thei ve reng thin. Rokûnga chuan hetia hlo a han thlawh ve lai hi a dam chhûnga a hun hman hlimawm ber niin a sawi. Nimahsela, hlo han thlawh chu a hrisêlna lamin a lo tlin mang hauh lo va, kum 1934, January 2 atang khân Loch Printing Press (tûna Synod Press ni ta)-ah a thawk tan ve ta zâwk a. Chu hna chu a dam chhûnga a hna atân a hmang ta a ni.

Nupui Fanau leh Thu leh Hla lam :

Kum 1935, April 9-ah Zamawii nên, Pastor Chhuahkhama kutah an innei a; fanu 3 leh fapa 5 an nei. Kum 1940, April thlaah Mission Vengah an insawn a, 1945-ah Kohhran Upa atan thlan a ni.

         Rokûnga hian kum 16 vel a nih lai atangin hla a phuah tan nia hriat a ni a, mahse sak lar leh mi hriat zauh hlawh lêm lo va. Tih tak tak deuhva a phuah tanna chu kum 1939-ah a ni; a hla hmasa ber chu, ‘Vân hnuai khuavêl sakhming chhiarin’ tih kha a ni. Chuta tang chuan ram hmangaihna lam hla te, ram ngaih hla te, hringnun awihna hla te, leilung leh Pathian thilsiam tinrêngte mawina lam chawina te, Pathian fakna hla hrim hrim leh hun bik neia sak chi te; ram leh khawtlang hmasawnna tûra mite thinlung tiharh thei tûr chi te, Mizo nih hlutzia leh hnam ze tha lai chhawm nun a tûlzia te hla mawi tak takah a phuah chhuak a. A hlate hi Mizo tân a hlu ngawih ngawih a, thalaite tân a tangkai a; kan hun pawimawh leh Krismas vuakvetah phei chuan kan inawih tleina ber a ni kumkhua dâwn a ni.

Thalaite sak tûr ngaihtuahin kum 1942 atangin Thalai Hla Bu tûr a buatsaih tan a, 1952-ah chhuah theih a lo ni ta a ni. Kum 10 teh meuh a bei a nih chu. A thahnemngaihna hi a ropui ngawt mai.

Rokûnga khân mite ngenna avângin hla a phuah nual a, a hla tam ber erawh chu ama ir-âwm chhuak, a thinlunga lo awm, hlaa a rawn din chhuah a ni hlawm. Hla thu un pui pui hmang lovin, hla thu tluang pângngai, tha tak si a hmang thin a. Hla thlûk siam a thiam êm êm a, a thu lam rik nêna inmil tûrin a siam thin a; “Mizo tawng hi thlûk nei sa a ni a, chumi thlûk ang zûl-zuia hla thlûk kan siam chuan a sak a nuam bik a ni,” a ti thin. Chuvangin Mizo hla bil bik ‘Kan Zotlâng ram nuam hi Chhawrpial rûn i iang e‘ tih chu Assam Regiment Band Party-in kalrem hlaah an hmang a a ni tih te, ‘Lêntupui chawi vêl leh romei chhûmin‘ tih leh ‘E khai! Hlim rawh u, nui rawh u,’ tihte chu N.Delhi-ah Republic Day khârna Beating the Retreat-ah Band Party-in rimawiin an rem bawk thin tih han hriatte hian Rokûnga hlutzia leh Mizote tâna a chhuanawmzia a lang chiang tulh tulh thin a ni. A thlûk mawina vâng ringawt pawha hnam dangin min tâwmpui duh tûr khawp hla dang hi engtikah nge kan hla phuah thiamte hian an rawn chher chhuah leh ang le?

A hla hmasa ber, ‘Vân hnuai khuavêl sakhming chhiarin‘ tih a phuah atanga a hla hnuhnung ber, ‘Sualin bo mah ila’ tih a phuah May 7, 1969 (kum 30) chhûng hian hla 129 a phuah a; chûng chu Kristian hla 55 (Krismas hla 20 telin), khuarèl (nature) phuahna lam hla 22, ram leh hnam hla 14 leh hla dang chi hrang hrang 38 te a ni.

        A hla phuah ber chu, ngaihtuah lâwk pawh awm lovin mut dâwnah te, mut hnuah te a thinlungah a lo lang a; chu veleh a ziak ta thin a. Press- ah pawh pencil leh lehkhapuan a inchhawp reng a; hla a lo lan veleh a ziak nghâl thin.

Rokunga hi ft. 5 leh inchi 3-a sang, hmel fel vang mai, hmai êng nei tak si, mahse, taksa ngo tak ni lem lo, sam dum, mitmu dum uk lam deuh a ni a; sa inphut tawk tak, dar kûl deuh hlek; han en reng reng pawha Kristian hmêl pu tih hriat tak, inchei fel tak thin a ni. Kohhran ngaina, tawngtai peih tak, fiamthu thawh zen zen lo, mi fiamthu-ah erawh chuan nuihza thei tak mi a ni.

Ram leh hnam a hmangaihzia leh a Mizo-na hi chu sawi ngai lovin a hla atang hian a hriat theih mai a. A hlate hi Mizo, hmun hrang hranga awmte pawh, min tilungrualtu, min phuar khâwmtu tha ber pakhat a ni.

A nat dan leh a thih dan:

Kum 1966 February thla khân Durtlâng damdawi inah a rilphir an zai a; damdawi in atanga a lo chhuah hnu kar khat lekah Ram Buai kha a lo thleng ta si a; a damkawr a damkawrin Lunglêng leh Vawkzâwn lamahte an han tlânchhe ve leh rih a. April 18-ah Bilkhawthlir lamah an chhuk a. Chuta thla 3 an awm hnuah Aizawlah an lo chuang chhuak leh a. A hna ngai chhunzawm lehin kum 1969, July 9-a a awm nuam lo tan chu July 12 tlai lamah chuan nikhaw hre lovin a awm ta a. Doctor-ten theihtawp chhuah mahse zân dar 10:15-ah chuan,

‘Ka thla chau a chawl ta, I thisen luangah chuan;
A ropui dâwn mang e, I chhandamna hmun râlmuanga,
Ka chawl kumkhua tûr chu,‘

tia a lo thlîr lawk thinna hmun pan tûr chuan a nupui fanau, a thenrual tha leh a rawngbâwlpui te, leh a hmangaih êm êm Zoram chhûng leh pâwna Zofate chu mual a lo liamsan ta a ni.

          A thih atanga kum 30 a lo liama khawvêlin kum sangbi thar, 2000 AD a lo kai meuh chuan, rangkachak leh lung man tam aia hlu zâwk, Zofate tâna ro hlu chhertu Rokûnga chu tûn kum za chhûnga hla phuah thiam ber nihna, ‘Poet of the Century’ hlan a lo ni ta a. A hla phuahte han hmuh hian a ‘phu rêng e,’ kan ti theuh âwm e. Amah chawimawi nân Aizawl City Park-ah a lim din a ni a, August 15, 2008 khân hawn a ni.