Pian leh Murna :

Zirsangzela Hnamte hi December ni 1, 1952 khan Sialsuk khuaah a piang a. A pa chu Kawlkhuma a ni a, a nu chu Tlangruati a ni a, unau 8 niin, a upa ber a ni a. A unaute chu hmeichhia pathum leh mipa pali an ni. A naupan lai atang rêngin a thiante aiin a mizia a danglam a. Amah hi hla phuah thiam, zai thiam bawk si a ni.

Kum 1988 September ni 16 khan Lalhungchhungi Pachuau nen an innei a. Mi ngawichawi leh zakzum, mi dangte tân hnawksaka awm hlau em em a ni a, chutih rualin a thil tih rêng rêng chu a duhtui em em thung a. A nu leh pate chuan, “A mizia hi sawi thiam a harsa a, mize danglam tak a ni tih hi kan sawina a ni fo,” an ti a. A nupui, Lalhungchhungi Pachuau pawhin, “Ka pasal kha mize danglam, mi introvert tak an tih ang mi kha a ni a. A miziaa tha ka tih em em chu mahni intihlârna ang chi a khêl ngai lo kha a ni,” tiin a sawi.

Zirna chanchin :

Zirna lamah chuan Sialsuk Primary Sikul atangin pawl thum a pass a. A pa chu Middle Sikul zirtirtu a ni a; chuvângin, Middle Sikul chu a pa thawhna Bualpui (ng) leh Thiltlangah a kal a. High School chu Delhi-a Rabindranath Tagore International High School-ah a zuk zawm ve a; nimahsela, mi nun khawhar a nih avângin hmun hla taka lehkha zir chu harsa a ti a, Mizoramah lo kir lehin Durtlang High School atangin pâwl sâwm a pass a. College zawm turin Shillong-ah a chhuk leh a, Shankardev College-ah a lût a. A tumruhna chuan a hneh a, heta tang hian B.A. a pass chhuak a.

Hla Chungchang leh a chhehvel:

A hlate hian Zoram dung leh vâng chauh ni lovin, khawvel khawii hmunah pawh, Mizo awm tawhna phawt chu a thleng a; hla hi 75 chuang zet a phuah a, a bu hrang pawhin a chhuah tawh hial a ni. hla a phuah mai bâkah zai a thiam tel bawk a. A aw tha vak lo mah se, a zai lunglenthlâkna leh thinlung taka hla sa thin a nih avângin a zai chuan mi ngainat a hlawh hle a. All India Radio-ah hla 40 a khung a, ‘B’ High Grade Music Artist a ni a. Doordarshan Kendra Aizawlah hla pali a khung bawk. Tin, cassette pakhat, ‘Zoremsiami’ tih a siam a, Mizo cassette hralh tla ber pâwl a ni. A hla phuahte hi amah mai bâkah zai thiam mi hrang hrangin tûn thlengin an la sa nasa hle a, an lârpui deuh zêl bawk. A hla phuah zingah ‘Darthlalang’, ‘Zonunmawi’, ‘Sekibuhchhuak’ tih leh ‘Luah loh run’ tih te chu chu Sikul zirlai hrang hrangah telh a ni tawh bawk. A hlate hi sak tur chi deuh vek an ni a, hla hril (Poem) kan tih ang chi hi chu pakhat chiah a phuah a. Chu chu ‘I harh ang u’ tih Intodelhna lam hawia a phuah a ni a. Kum 1999 March ni 26-a, Aizawl AIR in “Intodelh” tih thupui hmanga Spring Concert, Vanapa Hall-a a buatsaih recitation atan a phuah a ni. Tin, hla phuah thiam chawimawina vawi 11 leh zai thiam lawmman vawi 3 a dawng a, a hlaphuahte chu zirlai bua seng luh a ni hlawm bawk.

A zai thiam ai mahin a hla phuahthiamna hi a larpui mah mah emaw ni chu aw a tih theih. A ngaihtuahnain mihring nun a chhutthiam hle a. Mihring nun ril taka a ngaihtuah chhuahna atanga Darthlalang hmanga hla hlui thei lo a rawn siam chhuak thiam te hi miril a nihna a lang chiang hle. Kum 1978 khân Mizoram sawrkar hnuaia Economics & Statistics Dept-ah Primary Investigator hna a thawk a. He hna hi kum thum a thawh hnuin kum 1981 khân All India Radio-ah Production Assistant hna a hmu a, chutah chuan a insawn a. Kum 1984-ah UPSC exam kal tlangin All India Radio Programme Executive-ah a kai sâng a. Kum 1999-ah Assistant Station Director-ah a kai sâng leh a, a thih thlengin he hna hi a thawk.

A hla phuah zinga 40 zet chu Radio ah a record tawh a. Kum 1987 khan a vawikhatna atan Audio Album Zoremsiami tih a siam a, a hla phuah tha tak tak a thun tel a. Shillong-a a awm lai khân Zirsangzela Hnamte hian nupui a nei a, chu nên chuan fanu Catherine Zoremsiami an hring a; amaherawhchu, ‘khua tuah’ loh na na na chu an inthen leh a. Chumi hnu chuan a thih thlenga a nupui Lalhungchhungi Pachuau, radio artist ve bawk nên kum 1988-ah inneiin fapa pakhat, Stephen Rualzakhuma Hnamte an hring a.

Zirsangzela Hnamte miziaa thil duhawm leh mawi tak chu mi nun tlâwm a nihna kha a ni. Thiante zingah a chapo ngai lo va, puipunna rêng rêngah tlar hmasa lama thut a hreh em em thin a. A hla thenkhat phei chu a hnua a han chhiar lehin belhchian dawl lo, tim uai uaina khawp niin a hria a. Mahse, a nuai reh leh dawn chuan miin radio-ahte an lo sa hmanin, hla bu-ahte an lo telh hman tawh si a. Radio-a an la thun loh hla thenkhat belhchian dawl lo deuh nia a hriatte phei chu a tlangzarh duh lo va. Chuvângin, a hla phuah eng emaw zât chu hai chhuah lohvin a awm ang tih a rinawm.

Zirsangzela hi mi themthiam tak a ni a. Shillong-a a awm laiin tingtang hrui sawm nei a tuk a, an thianhovin hla rem nân ber an hmang a. Kha tih lai khan AIR, Shillong-ah Mizoten darkar khat awh programme an nei ve a. An thian zahovin Shillong station-a hla an thun châng pawhin Zirsangzela tingtang tuk chu an thawhchhuahpui ber thin a ni.  ‘Luah Loh Run’ tih hla hi kum 1980 bâwr vel khân AIR, Aizawlah a sa (thun) a. A nupui Lalhungchhungi Pachuau nen an inneih hma a la ni a. Tin, Lalhungchhungi chu radio-a hna lo thawk tawh sa a ni a, Zirsangzela chu a lo buaipui a. Zirsangzela chuan a hla rempuitu, rimawi tumsaktu a nei lo va, amahin hollow guitar a inperh chawp a; radio-a hnathawktute lam pawh hawi ngam lovin, bang lam hawiin an hla record chhung zawng a thu tluan zak a ni. Tin, Zirsangzela hi mi inthukru mi a ni tih a lanna pakhat chu: television-a khawhar chhûngte pual programme hman hi tul a ti ve lem lo va, en pawh a en ngai lo. An zinna leh an ram fan tawh te, an damlohva phaia an inenkawl dân vêl tihlan vak vakte chu ani ngaihah chuan thil tul lêm lo a ni.

Khawvel bik a nei a, ngawi renga inngaihtuah a ching a, chutah chuan a inhrai tlai a. Pindan chhûngrilah a inkhung cheuh cheuh va, a nupui chokaah a vei a vei a; a nupuiin a nin châng chuan, “Aw! Mahni chauhva awm i va han peih tak em!” a ti a. Ani chuan, “Ka rilru ka kawm alâwm,” a ti mai thin. Tin, mi khawhar, hla lunglenthlak tak tak phuahtu a ni tih kan hre theuh va; mahse hla 69 a phuah zingah, kum 1973-a Shillong-a a phuah, ‘Run Zau’ tih hlaah lo hi chuan thla (moon) a sawi lo! (Hre sual lo turah ka inngai.)

Mi dang tâna hla phuah leh mi dang hla phuahsak pawh a nei nual a. A nupui Lalhungchhungi Pachuau nên an inngaihzawn laiin vawi khat chu: kum 1987 khân Lalhungchhungi chu Delhi-ah a zin a. Lalhungchhungi zin hlan chuan Zirsangzela chu a lo lunglêng hman hle tawh a. A zin a haw chuan an inah a lêng nghâl a, “I tân hla ka phuah asin,” a ti a. Khâwla chhut pawh ni lo, lehkhapuana ziah chu a pe a.

Lalhungchhungi chuan, “E,” a ti a, a la mâwl tawp ringawt a, chhungrilah lâwm deuh siin lâwm angin a lang duh miah lo va. Zirsangzela chuan, “I chhiar dawn na nge?” a ti a. Lalhungchhungi chuan zak deuh chungin ngawi rengin a chhiar a, a lái em em mai a. Eng tin vak maha a chhânna a dawn loh avângin Zirsangzela chuan, “I lâwm lo tawp a nih kha! Khawi, ka pawt thlêr leh vek dawn,” a ti a. Ani chuan, “Ka lâwm alâwm,” a ti a, a pe lêt phal lo va. Chu hla chu ‘Kumtluang Pâr’ tih, Lalhungchhungi Pachuau ngeiin thiam taka a sak:

‘Chhaktiang kâwl êngin zing daifim,

Par tin tân malsawmna a chantir a;

Hmangaih di tawna ka lunglen hi,

Malsawm siktui thiang chang ve se,’ tih hi a ni a, Zirsangzela khân a pawt thlêr hman ang tih a hlauhawm hle. A tlar tin hawrawp bulah, a chhuk thla indawtin, “Ka hmangaih che,” tih a bilh ru tel a. He hla hi Zirsangzela’n lengzem hla a phuah hnuhnûn ber a ni ta a ni.

Lalhungchhungi nên an inneih hnu chuan hla a phuah ngai ta lo va. Kum 1995-ah hla sak chi, ‘Pathian I Ni Si,’ tih leh, kum 1999-ah chham chi, ‘I Harh Ang U,’ tih a phuah leh a. Hêng hla pahnihte hi hmana Zirsangzela’n a phuah thin hla ang kha chu a ni tawh lo. P.B. Shelley-a chuan, “A phuahtirtu thlarau awm lovin miin ama thuin hla a phuah thei lo,” a ti a. Lalhungchhungi nên an inneih hnu hian Zirsangzela Hnamte, amaha hla phuahtirtu eng emaw ‘rau’ awm thin kha a kal bo ta em ni ang le?

Tichuan, Zirsangzela chu kum 2001 October thlaah khawsik leh chaw helh neiin a insawisel tan a. CMC, Vellore an panpui nghâl a. Chutah chuan a natna chu cancer a ni tih an lo hmuchhuak a. A natna chu phunnawi lo leh chhel takin a tuar a. Kum 2002 October ni 15-ah Mizote zinga arsi lian lo lang chu a her liam leh ta a ni