Pahlira Sena Chawngthu ( PS Chawngthu )

A puangtu Pahlira Sena Chawngthu ( PS Chawngthu ) tih hi All India Radio, Gauhati, Shillong atanga ngaithla lo, Mizoram pa vengva deuh leh Zoram pawna cheng kan tam lo hle ang. All India Radio Aizawl Station kan neih hma daih, Mizo Programme Minute sawmthum emaw awrh chauh kan neih lai a nih kha. Kan hriat theuh angin Radio khawvela Mizote zinga sulsutu, dai lo tawn hmasa chu a ni ngei mai. P.S.Chawngthu hi Mizo pa tak, pa tumruh, ngaihtuahna hmang tak mai mi a ni. Khawvel khawsakna lama rual el tak a ni. Chutiang a nih avang chuan khawvel a dai zau hmain hna hrang hrang a thawk teuh tawh a ni. Pa lungleng thei, thu thiam, ngaihtuahna hlaa hril chhuak thei mi a lo ni hi a lawmawm hle a ni. Mizo hla History-ah hian a kut chuakte hian hmun pawimawh tak an luah a ni. Ama ngaihtuahna mai bakah miin an lunglenna emaw, an khawharna emaw a kianga an sawiin, anmahni aiin hlain a sawifiah thiam zawk a ni. “Zankhua a lo tlaiin kan khartung sawn ri” tih hla pawh hi mi tana a phuah a ni. Hla phuah thiamte hi mi lungleng thei, thil chik mi an ni chawk a. Nulat tlangval thua rual ban lo an awm ngai lo ang bawkin, amah P.S.Chawngthu pawh hi a hla atangte hian a len lai nite chuan Val to lo zawk zawk a ni lo tih a hriat theih mai.

1st Dec, 1912-ah Mission veng, Aizawlah a lo piang a. A pa chu Upa Ch. Pasena (L) a ni a, an unaua upa ber atanga chhiara a pathumna a ni. Naupang harh tak a ni a, lehkha thiam thei zet mai, zir peih hauh si lo a ni. Kum 1929-ah Pu Vankhama Violin tum a hmu a, a duh ta em em a, A pain kum 1933-ah a leisak a, missionary Rev. Edward nupui hnenah reilote a zir a, kum 1938 velah chuan Mizorama Violin tum ve thin ho zinga a lak tlak ber zingah a tel ve hman a ni.

Burma Oil Company-in Mizorama Oil an zawnin tawng lettuah a tang a, Zoram hmar lam Tuirial dungah hna a thawk ber. Mizo Guerilla Force-ah tawng lettuah a tang leh a, Zoram chhim lamah Tuipang velah ramhnuaiah a awm thin. Royal Indian Force-ah a lut leh a, Security Personnel atan an thlang leh a, Temporary Sergeant-ah a awm hman a ni Chumi hnuah Dance Orchestra-ah a lut leh a, “Romance Francisco and his Hawaiin Screnaders” an tih Orchestra-ah a lut a, chutah chuan Guitar a tum ber thin. Violin leh Double Bass leh Jazz Drums-te pawh a tum thin. Heng Musical Instrument-ahte hian eizawn theihna khawpin a thiam vek bawk. Tonic Solfa leh Staff Notation pawh a thiam hle.

Musical Instrument hrang hrang a thiam bakah Dance (Lâm) pawh thiam tak a ni. Floor show atan Spanish leh Continental Dance te, Cabaret show leh Stage show-a entir tur chi a thiam vek a, an Band Leader fanu nen an inkawp thin. Tin, Ballroom Dance pawh a chi hrang hrang, Foxtort, Waltz, Tango, Rumba, Samba, Quick step, etc. zirtirtu ni thei khawpin a thiam a ni. Culcutta-ah kum 1944 khan Jive Competition-ah a partner Juda nula Rachael Abraham nen 1st Prize an dawng nghe nghe.

Tin, Guitar hian Swing leh Jazz music lam an tum ber a, Karachi-a a awm laiin intihsiaknaah 2nd Prize a la bawk. An Band Leader hi Phillipines hnam a ni a, India ramah hun rei vak lo an awm hnuin Pakistan-ah an insawn a, chuta tangin Musical Tour an nei a. Iran, Iraq, Kuwait,Lebanon, Syria leh Italy-te an tlawh thin a ni. Tin, South East Asia lamah Singapore, Indonesia, Phillipines, Island-te an tlawh bawk.

Mizo zingah chuan Dance & Music (Lâm leh Rimawi) hnathawhnaa thawk hmasa ber a ni awm e. Ram dangah kum 12 zet Mizoram leh India ram hmu lova a awm hnuah kum 1955-ah Mizoramah a lo chhuak a, Guitar Solo (tunlaia Lead Guitar) an tih ang rawn hmelhriattirtu a ni.

P.S. Chawngthu hian ram danga rimawi khawvela a hun a hman chu bansanin a pian leh murna ramah a rawn chuang chhuak a. Mahse vanduaithlak takin damdawi inah, Durtlang Hospital, Derhken tlangah thla sarih lai mai T.B. natna avangin a hun a hmang ta a ni. Hetih hun lai pawh hian hla phuah a chawl chuang lo. Pathian ropuizia, thil siam mawizia, makzia te chiang lehzualin a hriat phah a, Pathian fakna lam hlate pawh a phuah a ni.

A natna a dam fel a, a tuina lam pang bawk, Mizo Programme, All India Radio, Gauhati-ah thupuangtuah kum 1957 atangin a thawk tan leh ta a ni. Gauhati atangin Shillong All India Radio, Mizo Section enkawl turin an sawn a, chanchinthar lehlin leh puante an kawp a, a tul apiang Mizo ta a nih avangin an thawk bawrh bawrh mai a ni. Shillong-a an thawh lai chanchin lehkhathawn an hmuh tamzia leh maksak tak tak chanchin sawi tur a tam na a, sawi hrih lo mai ang.

Heta a thawh lai hian Khasi nula Disola Lyngdoh nen an intawng a. Ani P.S. Chawngthu pawh tlangval nupui neih hun, kum 43 a lo ni ve ta bawk nen, April 1966 khan English Congregation Church, English Service kan tih mai thinah khan ‘tiam tlat e’ an ti ta a ni. Pathian malsawmna an dawng a, fa hmeichhia pali a upa lam leh mipa pahnih a naupang lam an nei a, a fanu upa ber erawh chuan a boralsan tawh. All India Radio atang hian Dec. 31, 1982-ah a pension ta nghe nghe a ni. Tichuan Aizawla a lo chhuah hian Mission Vengah a inbengbel a, a nupui fanaute nen an khawsa a ni. Kum 1988 khan Mizo Academy of Letters (MAL) Award an pe a, thu leh hla chawimawina dang pawh pakua lai a dawng bawk. A kum a lo tam ve ta bawk nen, lung lam that lohna a nei a, a kal lam natna a nei bawk nen, March 3, 2005-ah Mission Veng thlanmualah a lei taksa chu vui liam a lo ni ta a ni.

Hla hi kum 1940-ah a phuah tan a, a hla phuah tam ber hi mipa leh hmeichhia inhman kawp theih chi tura a duan chhuah vek a ni. Love song te, Pathian hla te, pangpar hlate a phuah thin. Lengzem hla, lenglawng hla leh siamtu thil siam mawina lam hla phuahtu ropui a ni. Mizo thu leh hlaa a thawh hi a ropui, thangtharte min hnutchhiah hi Mizoram a awm chhung hian a dai dawn lo, a boral mai dawn lo, a nung reng dawn a ni.