Lalzuithanga Biography : Hla phuah thiam, rimawi tum thiam, thawnthu phuah thiam, lemchan ziak leh chan thiam, mistiri hna leh khawl lam thiam, ruahman (design) leh plan thiam, cheimawi (decoration) thiam, fiamthu (humour) thiam, milem ziak thiam angte hi mi hrang hrangah chuan a eng ber emawte hi chu thiam tak tak an awm a, mahse hla phuah thiam chuan mistiri hna a thiam kher lo thei. Rimawi tum thiam pawhin milem ziak a thiam kher lo vang. Mahse Lalzuithanga hi chuan heng kan han ziah chhuah ang zawng zawngte hi a zirtirtu ni tlak khawpin a thiam zo vek a ni. Amah ang hi Zoram chu sawi loh, khawvelah pawh hian chhiar tham lek emaw an awm chauh ang. Ama hunlai vete kha chuan Mizoram hi a la pachhe lutuk a, engmah thil remchang la awm loh lai a ni nain, mi dang ngaihtuah phak loh kha a ngaihtuah chhuakin a duang nalh chhuak hun kha ni ve se chuan, Arts lam kawngah hi chuan Zoram zat thei thin a ni. Tunlai ang hun remchangte hi a vanglai hi a her danglam thei hial ang.
Lalzuithanga hi 16th April 1916 khan Kulikawn, Aizawlah a piang a, a pa chu Kohhran Upa Chawnghnuaia a ni a, Pachuau hnam a ni. Lehkha zirna lamah chuan Aizawl School pawl sang ber (chung lai huna mi) pawl VIII pass a ni. Chumi hnuah la herna khawl an lei a, an la her chhuahsa chuan lachilh (rizai) a siam thin a, tin, hlo pawh thlovin hun engemaw chen chu a ramtang thin a, chung a tih pah chuan hla phuah te, thuziak te, lemchan ziakte leh khawl chi hrang hrang, puan thui khawl, type writer, gramaphone angte a repair thin bawk.
Thil ruahman dan a thiam em em a, Carnival ang Kulikawn vengin an siam tawh chuan Kulikawn cheimawitu a ni. Assam Governor hial pawh khan mawi a tiin an en duh hle a, an din phah ve ngat ngat thin.
Milem ziak hi a thiam hle bawk a, chung lai huna a milem ziak (pencil drawing) la hmuh theihte chu hetah hian kan tarlang thei lo. Kum 1944 vela a ziak nia hriat a ni. Mizo hmeichhia sipai (Women Auxiliary Force, India) leh Pin Up Girl a ziak a ni. Lemchan leh milem ziak a thiam em avang hian Mission M.E School-ah Drawing Master hna an pe ngawt mai bawk a ni. Tin, Indopui II-na lo chhuah tan tirh khan Mizo Labour Corps-ah Asst. Commander hna a thawk a, chumi hnuah Royal Indian Air Force-ah Armourer Department-ah Demonstrator hna a thawk bawk a ni.
Tin, Rimawi tum pawh a thiam hle a, Hawaiian Guitar, Hollow Guitar leh Violin pawh a tum thin a, vantlang inkhawmna hmunahte pawh a tum fo thin. Drama a ziak thiam hle bawk a, tun thlengin a drama ziakte chu vawn that a la ni. Thawnthu pawh hle, chungte pawh chu tunlai hian an chhuah thar leh nual ziak tam tawh bawk.
Lalzuithanga hi a dam reilo hle mai. Nupui pawh a nei lova, tlangval thalai tak niin lung natna vangin 25th September, 1950 khan Silchar bulah a thi ta a. Kum 34 leh thla 4 leh ni 9 a dam a ni.